“Nga auditorët në tregun e punës: Një mundësi e re për studentët tanë!”
Departamenti i Financës dhe Kontabilitetit, në bashkëpunim me Bankën OTP në Vlorë, zhvilloi një iniciativë të vlefshme në datat 1 & 2 Prill 2025, në auditoret e Fakultetit Ekonomik. Drejtues të kësaj banke u takuan me studentët e vitit të tretë Bachelor në Financë dhe Kontabilitet, si dhe me studentët e programit Master në të njëjtat fusha.
Qëllimi i këtij bashkëpunimi ishte krijimi i mundësive për punësim dhe afrimi i studentëve me tregun e punës. Iniciativa rezultoi mjaft e frytshme, duke i dhënë studentëve tanë mundësinë për të hyrë në tregun e punës. Disa prej tyre tashmë kanë kaluar fazat e para të përzgjedhjes dhe janë një hap më afër punësimit pranë kësaj banke.
Ky bashkëpunim tregon edhe një herë rëndësinë e lidhjes së universitetit me tregun e punës, duke ndihmuar studentët të hedhin hapat e parë drejt karrierës së tyre profesionale.
Falenderojmë Bankën OTP, Vlorë, dhe drejtoreshën e kësaj banke, Znj. Besmira Arapashi, për këtë mundësi bashkëpunimi dhe mbështetjen ndaj studentëve tanë!
