Konkurse kombëtare dhe ndërkombëtare

Studentët e Universitetit “Ismail Qemali”, Vlorë kanë arritur rezultate të shkëlqyera në disa konkurse kombëtare prestigjioze, duke treguar nivel të lartë përgatitjeje dhe aftësi komunikuese dhe frymë bashkëpunimi.

Vendi i Parë në konkursin University Law Competition
“University Law Competition” u organizua nga Halim Foundation Institute, më 31 maj dhe 1 qershor, dhe kishte pjesëmarrjen e 16 universiteteve publike dhe private nga Shqipëria, Kosova, Maqedonia e Veriut dhe Mali i Zi. Studentët tanë shkëlqyen në të gjitha fazat e konkursit, duke trajtuar katër çështje gjyqësore të ndryshme dhe duke kaluar me sukses çdo raund drejt finales, ku sigluan fitoren përfundimtare. Ky rezultat dëshmon nivelin e lartë të përgatitjes akademike, angazhimin dhe profesionalizmin e studentëve tanë, si dhe përkushtimin e stafit pedagogjik të Departamentit të Drejtësisë. Ky është një hap i rëndësishëm drejt afirmimit të Universitetit “Ismail Qemali”, Vlorë, si një qendër cilësore e arsimit juridik në nivel kombëtar dhe rajonal. (podcast me fitueset)

Studentet fituese:
• Altea Hoxhaj (Fakulteti i Shkencave Humane)
• Bianka Kananaj (Fakulteti i Shkencave Humane)
• Kiara Karabinaj (Fakulteti i Shkencave Humane)

Vendi i Parë në konkursin universitar “UniDebate”
Në datat 18–19 qershor 2025 u zhvillua konkursi kombëtar “UniDebate” me pjesëmarrjen e 8 universiteteve publike dhe private nga i gjithë vendi. Ky aktivitet u organizua nga Liburnetik dhe u mbështet nga Agjencia Kombëtare e Rinisë dhe Ministria e Shtetit për Rininë dhe Fëmijët. Ekipi i Universitetit “Ismail Qemali”, Vlorë u shpall fitues i vendit të parë, duke spikatur me mendim kritik, argumentim të qartë dhe prezantim profesional. (editorial)

Anëtarët e ekipit fitues “UniDebate”:
• Blerina Canaj
• Klea Hoxhaj
• Paola Kapllani
• Fatime Hodaj

Vendi i Dytë në Konkursin Kombëtar të Debatit Ekonomik për Universitetet
Më 20–21 qershor 2025, studentët tanë u vlerësuan me vendin e dytë në konkursin kombëtar të “Debatit Ekonomik” për Universitetet, organizuar nga Junior Achievement of Albania. Përmes analizave të thelluara ekonomike dhe argumentimit të bazuar, ata treguan një nivel të lartë profesionalizmi dhe njohuri në fushën e ekonomisë. Gjithashtu, në këtë konkurs, studentët e Universitetit “Ismail Qemali”, Vlorë, u renditën në vendin e dytë në nivel kombëtar, ndërkohë që studentja Bianka Kananaj u vlerësua me çmimin e parë “Folësja më e mirë” e konkursit dhe studentja Fjoralba Latifaj mori vendin e tretë si “Folësja më e mirë”. (njoftimi i plotë)

Anëtaret e ekipit pjesëmarrës në Debatin Ekonomik:
• Bianka Kananaj (Fakulteti i Shkencave Humane)
• Fjoralba Latifaj (Fakulteti i Ekonomisë)

Aktivitete UniVlora

Maratona 2025
Më datë 29 maj 2025 u zhvillua aktiviteti, “Maratona 2025” nën sloganin “Fuqia e paqes kundër dhunës dhe bullizmit”, në kuadër të nxitjes së një jete të shëndetshme dhe aktive duke promovuar aktivitetin fizik tek studentët dhe stafi akademik. Qëllimi i këtij aktiviteti është forcimi i komunitetit universitar, krijimi i ndjenjës së përkatësisë dhe bashkëpunimit mes pjesëmarrësve, promovimi i universitetit si një institucion aktiv dhe i përkushtuar ndaj zhvillimit gjithë përfshirës të studentëve. Pjesëmarrës ishin të gjithë studentët nga të katërt fakultetet e UV-së. Maratona u zhvillua në akset rrugore (start–Rektorat,- Uji i Ftohtë Vlorë, finish- Rektorat). Fituesit e maratonës universitare u shpërblyen me çmime simbolike si medalion për fituesit e vendeve të para, të dyta dhe të treta, si dhe certifikata për fituesit e vendeve të para dhe pjesëmarrësit në këtë maratonë. (spoti promocional)

Fituesit e këtij edicioni ishin:
• Kristina Kantonikova (studente në departamentin e Biologjisë nga programi Erasmus+ Learning Agreement) - vend i parë nga vajzat
• Theodhora Ngjelo (departamenti Infermieri e Përgjithshme, Fakulteti i Shëndetit) - vend i dytë nga vajzat
• Emanuel Koço (departamenti Infermieri- Mami, Fakulteti i Shëndetit) - vend i parë nga djemtë
• Florjan Osmanllari - vend i dytë nga djemtë

Kampionati i Futbollit UniVlora 2025
Në ambientet e fushës sportive “Flamurtari” pranë Pyllit të Sodës, më datë 7 dhe 8 maj, u zhvillua aktiviteti sportiv “Kampionati i Futbollit” me pjesëmarrjen e studentëve nga të katërt Fakultetet e Universitetit “Ismail Qemali” Vlorë. Aktiviteti u zhvillua nën kujdesin e Sektorit të Këshillimit të Karrierës, Shërbimit të Studentëve dhe Alumnit, në bashkëpunim me Këshillin Studentor të UV-së, si dhe Sektorin e Promovimit dhe Marrëdhënieve me Publikun, në kuadër të nxitjes së mirëqenies fizike dhe sociale të studentëve, si dhe për të forcuar lidhjet mes tyre jashtë ambienteve akademike. Më datën 7 maj u ndeshën katër fakultetet ndërmjet njëri tjetrit; skuadra e Fakultetit të Ekonomisë me Fakultetin e Shëndetit, ku fitues doli Fakulteti i Shëndetit, ndërsa ndërmjet skuadrës së Fakultetit të Shkencave Humane dhe Fakultetit të Shkencave Teknike, fitues doli skuadra e Fakultetit të Shkencave Teknike. Më datë 8 maj aktiviteti u finalizua me ndeshjen e dy skuadrave finaliste skuadra e FSH dhe skuadra e FSHTN, nën brohorimat e tifozëve nga të dy fakultetet finaliste. (njoftimi i plotë)

Kupën UniVlora e fitoi skuadra e Fakultetit të Shkencave Teknike me rezultatin 4 me 1.